Novruz bayramı… Diqqət etsək görərik ki, hədislərdə Novruz bayramı deyə ifadə işlənməmişdir. Novruz günü deyilir. Biz deyirik ki, bayramdır. Bəs bayram hansı günə deyirlər? Hədislər buyurur ki, o gündə ki, Allah Təalaya qarşı günah işlənməz, həmin gün bayramdır.
Bəli, bayram o gündür ki, İmam Zaman ağa (ə.f) zühur edəcəkdir və Yer üzü ədalətə bürünəcəkdir. Ona görə əgər deyilərsə ki, Novruz – bayramdır, bu cəhətə görə bayramdır.
Nəql edilir ki, İmam Zaman (ə.f) zühur edən zaman İslam dinini bütün evlərə daxil edəcəkdir, necə ki, isti və soyuq evə daxil olur. Bütün bəşər əhli bir dinə sitayiş edəcəkdir. Novruz bayramı da öz gəlişi ilə baharı bütün evlərə daxil edir və qəlbləri təravətləndirir, ruhları şadlandırır.
İmam Zaman barədə olan Ziyarətnamədə bir hissə çox diqqət çəkir:
“Əssəlamu aleykə ya rəbiul-ənam və nəzrətul-əyyam.”
“Salam olsun sənə, ey aləmin baharı və günlərin təravəti.“
Rəbi (ربیع) ərəb dilində həm bahar mənası verir, həm də bahar yağışı deməkdir. Ənam (انام) isə nəfslər, qəlblər, insanlar və cinlər, yer üzündə yaşayanlar, hətta bütün məxluqatı əhatə edən geniş mənaya malikdir və lüğət kitablarında buna işarə olunmuşdur. Bütün məxluqatın, aləmin baharı o mənada deyilib ki, İmam Məhdi (əf) gələndə ölmüş yeri dirildəcəkdir. Necə ki, yaz gələndə bütün təbiət oyanır və torpaq sanki dirilir.
Ağam İmam Sadiq əleyhissalam bir hədisdə buyurur ki, bəs, “elə bir Novruz günü yoxdur ki, biz zühuru gözləməyək. Çünki o bizim və şiələrimizin günüdür.” Əllamə Məclisi, Zadul-məad səh.327
Başqa bir hədis də isə belə buyurur:
“Novruz günü mənim yanımda əzəmətli və ehtiramlı bir gündür. Hər bir mömin bu gündə məndən hacət istəsə, onu yerinə yetirəcəyəm”. Mustədrəkul-vəsail, c.3, səh.217, həd.5
Bəli mənim Ağam, biz də İmam Sadiq ağam kimi bu Novruz günündə sənin intizarında olacaq, səni gözləyəcəyik. Lakin boş deyil, əməl edərək gözləyəcəyik. Novruz gününün əməllərini fərəc qəsdiylə edəcək və savabını sənin özünə hədiyyə edəcəyik. İmam Sadiq ağam hacət istəyin yerinə yetirim buyurur. Bizim tək hacətimiz sənsən ya İmam Zaman…
Novruz gününün əməlləri:
Nəql edilir ki, Həzrət İmam Sadiq (ə) Muəlla ibn Xənisə Novruz bayramında aşağıdakı əməlləri yerinə yetirməyi öyrətmişdir:
Bayram günü:
1. Qüsl etmək;
2. Təmiz paltarlar geyinmək;
3. Xoş iyli ətirlərdən istifadə etmək;
4. Oruc tutmaq;
5. Dörd rükət namaz qılmaq.
Novruz bayramı günündə qılınan namaz:
Bu namaz 4 rükətdir (2 ədəd 2 rükət). Zöhr və əsr namazlarından sonra qılınır. Onun 1-сi rükətində “Həmd”dən sonra 10 dəfə «Qədr» surəsi, 2-сi rükətində “Həmd”dən sonra 10 dəfə «Kafirun» surəsi, 3-cü rükətində “Həmd”dən sonra 10 dəfə «İxlas» surəsi, 4-сü rükətində “Həmd”dən sonra 10 dəfə «Fələq» və «Nas» surələri deyilməlidir.
Namaz bitdikdən sonra şükür səсdəsini yerinə yetirib, «Məfatihul-Сinan» (yeni) kitabının 849-сu səhifəsindəki duanı oxumaq lazımdır.
İLİN TƏHVİL DUASI
بِسْــــمِ اللهِ الرَّحْمَنِ الرَّحِيم
یا مقلب القلوب والابصار. یا مد برالیل والنهار. یا محول الحول والاحوال . حول حا لنا الی احسن الحال
Duasının oxunuşu:
Bismilləhir-Rahmənir-Rahim.
“Yə̄ Muqallibəl-qulūbi vəl-əbsār.
Yə Mudəbbiral-ləyli vən-nəhə̄r.
Yə̄ Muhəvviləl-həvli vəl-əhvə̄l.
Həvvil hə̄lənə̄ ilə̄ əhsənil-hə̄l”.
Tərcüməsi:
Ey qəlbləri və baxışları (gözlərin hərəkətini) döndərən Allah!
Ey gecə və gündüzü ard-arda əvəzləyərək nizamla idarə edən Allah!
Ey ili (vaxtları) və əhvalları dəyişdirən Allah!
Bizim də halımızı ən gözəl hala dəyişdir!
www.imamzaman.az
¡ Sayta dair materiallar istifadə edildikdə istinad zəruridir.