Əyyami-Fatimiyyə və İmam Zaman (ə.f.) mövzuları bir-biri ilə sıx bağlıdır və Cəfəri məktəbinin əqidəsinin mühüm tərkib hissələridir.
- İlk öncə Əyyami-Fatimiyyənin nə olduğuna qısa toxunaq inşəallah.
Əyyami-Fatimiyyə (“Fatimə günləri”) İslam Peyğəmbərinin (sallallahu əleyhi və alihi və səlləm) vəfatından sonra onun əziz qızı Həzrət Fatimənin (s.ə.) üzləşdiyi müsibətlər və nəticədə şəhid olması ilə bağlı matəm günləridir.
Bu günlərdə möminlər məclislər təşkil edərək Həzrət Zəhranın (s.ə.) fəzilətlərini, İslam və Vilayət yolunda çəkdiyi əziyyətləri yad edir, ona edilən zülmə görə əza saxlayırlar.
- Yaxşı bəs, bu günlərin İmam Zamanla (ə.f.) əlaqəsi nədir?
Həzrəti Fatimənin (s.ə.) məzlumiyyəti ilə İmam Zamanın (ə.f.) qiyamı arasında birbaşa və qırılmaz bir bağ vardır. Bu əlaqə bir neçə aspektdən özünü göstərir:
İntiqam və Ədalətin Bərpası:
Hədislərdə İmam Zamanın (ə.f.) zühur edərkən əsas missiyalarından birinin tarix boyunca Əhli-Beytə (ə) edilən zülmlərin intiqamını almaq olduğu bildirilmişdir. Bu zülmlərin başında isə Həzrət Zəhraya (s.ə.) edilən zülm və Xanımın (s.ə) şəhadəti dayanır. Həzrəti İmam Zaman (ə.c) zühur edərək Cəddi Peyğəmbərin (s.a.v.v) əmanətinə xəyanət edənlərdən və onun qızına zülm edənlərdən haqq-hesab soruşacaqdır.
Gizli Məzarın Aşkar Edilməsi:
Həzrəti Fatimə (s.ə.) öz vəsiyyətində, ona zülm edənlərin cənazəsində iştirak etməməsi və məzarının gizli qalmasını istəmişdir. Bu, o dövrün hakimiyyətinə qarşı əbədi bir etiraz simvoludur. Rəvayətlərə görə, yalnız İmam Zaman (ə.f.) zühur etdiyi zaman nənəsinin mübarək məzarının yerini bəşəriyyətə göstərəcəkdir. Bu, haqqın batil üzərində qələbəsinin təcəssümü olacaqdır.
Hz. Fatimənin (s.ə.) haqqının qaytarılması:
İmam Zamanın (ə.f.) qiyamı, sadəcə siyasi bir hərəkat deyil, həm də mənəvi və ilahi haqların bərpasıdır. Həzrət Fatimənin (s.ə.) qəsb edilmiş “Fədək” bağları təkcə maddi bir mülk deyil, həm də Vilayət və İmamət haqqının bir rəmzi idi. İmam Zaman (ə.f.) zühur edərək bu haqqı və bütün digər qəsb edilmiş haqları öz sahiblərinə qaytaracaqdır.
Nəticə olaraq, Əyyami-Fatimiyyədə matəm saxlamaq sadəcə tarixi bir hadisəyə yas tutmaq deyil, həm də İmam Zamanın (ə.f.) ədalətli qiyamına olan intizarı gücləndirmək, haqqın yanında, batilin isə qarşısında durma mövqeyini bir daha bəyan etməkdir. Bu matəm, zühura qədər davam edəcək bir mübarizə ruhunu canlı saxlayır.
www.imamzaman.az