Şübhəsiz, məsumlardan (ə) bizə gəlib çatan dualar bütün haqq, maarif, səadət axtarışında olanlar üçün xalis və sonsuz bir xəzinə və çoşub-daşan hikmət bulağıdır. Ona görə ki, həmin şəxsiyyətlər İlahi elm dəryası, onun uca zirvələri və Peyğəmbər (s) elminin qapılarıdır. Doğurdan da əgər onların düşüncə, söz və münacatları bizə gəlib çatmasaydı, biz İlahi maarifin əsas qismindən məhrum qalardıq.¹
İmam Mehdi (ə.f) ilə bağlı dua və ziyarətnamələrdə Allahla münacat və Onun höccətinin hüzuruna təqdim edilən xalis niyyət və məhəbbət olduğundan, həzrətin şəxsiyyətini daha dərindən və yaxşı tanımaq, onunla əlaqədar olan qeyb dövrü, intizar və zühur kimi məsələlərlə də tanış olmaq üçün tutarlı sənəddir. Bu hissədə biz İmam Mehdi (ə.f) obrazını dua və ziyarətnamələr aynasından araşdırmağa başlayacağıq.
Ziyarətnamələr və duaların əksəriyyətində imam Mehdi (ə.f) əsil-nəsəbi və nəsli ilə tanıtdırılıb. Yəni o, gələcəkdə dünyaya gəlib, qiyam edəcək bir şəxs deyil, müəyyən, hal-hazırda həyatda olan bir şəxsdir. Onun xüsusiyyətlərindən bəziləri aşağıdakı kimidir:
1. O, Peyğəmbərin (s) pak nəslindəndir və həzrət Əlinin (ə) ilə Fatimənin (ə) övladlarındandır. “Nüdbə” duasında oxuyuruq:
“Hardadır seçilmiş peyğəmbərin (s) oğlu və Əliyyil-Mürtəzanın (ə), Xədicənin (ə) və Fatimeyi-Kübranın (ə) oğlu?”
2. O, Peyğəmbərlə (s) eyni ada malikdir və onun pak itrətindəndir. “Əhd” duasında belə qeyd edilib:
“İlahi, bizə adı Sənin Rəsulunun (s) adı ilə eyni olan və onun qızının övladı olan Öz nümayəndəni aşkar et”.
Həmçinin “Nüdbə” duasında belə qeyd edilib:
“Hardadır Allahın yer üzündə sona saxladığı “Bəqiyyətullah” (imam Zaman), elə bir şəxs ki, Peyğəmbərin (s) pak Əhli-beytindən (ə) kənarda deyil”.
3. O, Həsən ibn Əliyyil-Əsgərinin oğludur.
“Allahın Rəbbim olmasına razı oldum, dinimin İslam dini olmasını qəbul etdim və Peyğəmbərin Muhəmməd (s) və imamın Əli (ə) və Həsən (ə) Hüseynin (ə) …. və Həsən ibn Əli (ə) və Höccət ibnil-Həsənin (ə) mənim imamlarım olmasına razı oldum.²
¹. Dəyərli “Səhifeyi-Səccadiyə” kitabı bu iddiaya aydın bir nümunədir və hamının etirafına əsasən, bənzəri olmayan və təqdirəlayiq bir əsərdir.
². Şeyx Səduq, “Mən lə yəhzuruhul-fəqih” c. 1, səh. 327; “Məfatihul-cinan”, hər namazdan sonra müştərək olan təqibat.
www.imamzaman.az
¡ Sayta dair materiallar istifadə edildikdə istinad zəruridir.